Brýusselde ýerleşýän analitik platforma Brussels Energy Club tarapyndan gurnalan tegelek stolda Türkmenistan öz energetika syýasatynyň ileri tutýan ugurlaryny beýan etdi. Çäräniň dowamynda Türkmenistanyň Belgiýadaky ilçisi Sapar Palwanow Ýewropa Bileleşigi hem-de Ýewropa energetika kompaniýalary bilen ýurduň hyzmatdaşlygyny giňeltmäge uly gyzyklanma bildirýändigini belledi.
Diplomat Türkmenistan tarapyndan amala aşyrylýan strategiýa barada gürrüň berdi. Bu strategiýa uglewodorod serişdeleriniň eksport geografiýasyny giňeltmäge, gaýtadan işleýiş ulgamyny ýokarlandyrmaga hem-de energetika infrastrukturasyny ösdürmäge gönükdirilendir. Ýurduň bu ugurda esasy ýörelgesi uzak möhletleýin hem-de özara bähbitli hyzmatdaşlygy giňeltmegi maksat edinýär. Munuň hatarynda Ýewropa döwletleri we kompaniýalary bilen hyzmatdaşlyk hem bar. Bu barada sişenbe güni Türkmenistanyň Belgiýadaky ilçihanasy habar berdi.
Çäre gatnaşyjylar Türkmenistanyň gazyny Günorta gaz geçiriji arkaly Ýewropa ýetirmegiň mümkin usuly hökmünde seredilýän Transhazar gaz geçirijisiniň gurluşygynyň geljegini hem ara alyp maslahatlaşdylar. Bu taslama Ýewropa sarp edijileri üçin energiýa serişdelerini eltmegiň alternatiw ugrydyr.
Çäräniň dowamynda gaz serişdelerini gaýtadan işlemek aýratyn üns merkezinde boldy. Türkmenistan polimerler, dökünler, sintetiki ýangyç we beýleki senagat önümleri boýunça taslamalary durmuşa geçirýär. Bu bolsa Ýewropa maýa goýujylary we tehnologik kompaniýalary bilen hyzmatdaşlyk üçin giň mümkinçilikleri döredýär.
Brussels Energy Club — energetika howpsuzlygy we global energetika ugurlary boýunça meseleleriň ara alnyp maslahatlaşylýan, halkara bilermenleri, kompaniýa wekillerini, analitikleri we resmi ýolbaşçylary bir ýere jemleýän ekspert platformasydyr.
