Türkmenistanyň Magtymguly adyndaky Ýaşlar guramasynyň merkezi geňeşi Ýaşlar baýragyna hödürlenýän dalaşgärleriň resminamalaryny kabul edip başlady diýip, «Türkmenistan: Altyn asyr» internet-neşiri habar berýär.
Bäsleşige ýurdumyzyň edebiýatda, sungatda, ylmy barlaglarda, saglygy goraýyşda we sportda, oba hojalygynda, jemgyýetçilik işlerinde üstünlikleri gazanan, ýokary döredijilik başarnygyny hem-de işjeňligini görkezen 16 – 35 ýaş aralygyndaky ýaş raýatlary gatnaşyp bilerler.
Türkmenistanyň Ýaşlar baýragyna dalaş edýän ýaşlar ministrlikler, pudaklaýyn dolandyryş edaralary, döwlet edara-kärhanalary, jemgyýetçilik we döredijilik guramalary, ylym, bilim, saglygy goraýyş edaralary, ýokary we orta hünärment okuw mekdepleri, köpçülikleýin habar beriş serişdeleri tarapyndan hödürlenip bilner.
Baýraga hödürlenýänler 15-nji sentýabra çenli guramaçyly toparyna 3x4 ölçegdäki 6 sany reňkli fotosuratyny; pasportynyň nusgasyny; diplomlaryny, Hormat hatlaryny, KHBS-de çap edilen döredijilik eserlerini, teleýaýlymlardaky çykyşlarynyň ýazgylaryny; iş ýerinden ýa-da okuw mekdebinden häsiýetnamasyny; Magtymguly adyndaky Ýaşlar guramasynyň agzalyk şahadatnamasyny tabşyrmaly.
