29-njy martda Aşgabat şäherinde ýerleşýän «Ýyldyz» myhmanhanasynda we Dubaýdaky EKSPO Bütindünýä sergisindäki Türkmenistanyň pawilýonynda Türkmenistanyň nebitgaz pudagyna daşary ýurt maýa goýumlaryny çekmek boýunça halkara forum (OGT-2022) öz işine başlady. Maýa goýumlary çekmek boýunça halkara forum «Türkmennebit», «Türkmengaz», «Türkmenhimiýa» Döwlet konsernleri we Turkmen Forum hem-de «GaffneyCline» britan kompaniýasy bilen hyzmatdaşlykda «Türkmengeologiýa» Döwlet korporasiýasy tarapyndan gurnaldy.
Çärä gatnaşyjylaryň hatarynda CNPC, SOCAR, Dragon Oil, TOPH, Mitro International, Westport Trading Europe Limited, Haldor Topsoe, NAPECO we Yug-Neftegaz ýaly iri energetika kompaniýalarynyň wekilleri bar. Mundan başga-da, halkara maslahata halkara energetika guramalary – Nebiti eksport ediji döwletleriň guramasy (OPEK), Halkara energetika agentligi (HEA), Fransiýanyň gaz assosiasiýasy we Dubaýyň elektroenergetika we suw üpjünçiligi müdirligi (DEWA), şeýle hem Aziýa ösüş banky, Yslam ösüş banky we Abu-Dabi ösüş gaznasy ýaly maliýe we bank institutlarynyň wekilleri gatnaşdylar.
Forumyň çäklerinde ara alnyp maslahatlaşylan esasy meseleler:
• energetikanyň geljegi;
• sebitleýin energetika howpsuzlygyny üpjün etmekde Türkmenistanyň orny;
• täze energetika eýýamynda maýa goýum taslamalarynyň mümkinçilikleri;
• durnukly energetikany goldamak babatda maliýe institutlarynyň orny;
• uglewodorodlary gazyp almak babatda innowasion tehnologiýalar we nou-haular;
• gaz zyňyndylaryny azaltmak;
• uglewodorodlary gaýtadan işlmek we daşamak ulgamlarynda halkara hyzmatdaşlygy.
Has anyk maglumatlar bilen forumyň web-saýtyndan ýa-da : info@turkmen-forum.com elektron salgysynda tanşyp bilersiňiz.
